Kreu i grupit parlamentar të Partisë Socialiste, Taulant Balla, doli para mediave pas mbledhjes me opozitën dhe kryetaren e Kuvendit, duke folur për riorganizimin e komisioneve parlamentare.
Balla theksoi se kërkesa e PS është që numri i komisioneve të zgjerohet nga 8 në 11, duke theksuar se ky ndryshim është domosdoshmëri për funksionimin normal të Kuvendit. Ai kujtoi se një kërkesë e tillë ishte bërë edhe katër vite më parë dhe shtoi se Komisionin e Integrimit duhet ta drejtojë mazhoranca, jo opozita.
Sipas Ballës, ndryshimi do të kalojë për shqyrtim në seancën e nesërme plenare, pa pasur nevojë për njoftim paraprak, pasi bëhet fjalë për një çështje organizative të rëndësishme. “Kuvendi i Shqipërisë duhet të ketë një organizim të ri me 11 komisione. Është domosdoshmëri të kalojmë këtë etapë brenda kësaj jave,” deklaroi ai.