Elbasan – Federata Shqiptare e Hendbollit, në bashkëpunim me Akademinë e Hendbollit ALBA (HK ALBA), organizoi në qytetin e Elbasanit një aktivitet të veçantë promovues në kuadër të projektit “Master Plan 360”, i mbështetur nga Federata Europiane e Hendbollit (EHF).
Ky aktivitet kishte si qëllim forcimin dhe zhvillimin e hendbollit në Shqipëri, duke nxitur përfshirjen e fëmijëve dhe të rinjve në sport, si dhe duke krijuar mundësi të reja për identifikimin dhe zhvillimin e talenteve të së ardhmes.
Gjatë aktivitetit, pjesëmarrësit patën mundësinë të njihen më nga afër me hendbollin përmes ushtrimeve praktike, demonstrimeve dhe bashkëbisedimeve me trajnerë dhe përfaqësues të federatës. Iniciativa u prit me interes dhe entuziazëm, duke dëshmuar rëndësinë e projekteve të tilla për rritjen e sportit në nivel lokal dhe kombëtar.
Federata Shqiptare e Hendbollit falënderon të gjithë pjesëmarrësit, trajnerët, sportistët dhe mbështetësit që kontribuojnë çdo ditë për zhvillimin dhe promovimin e hendbollit në Shqipëri.