Të shumta do të jenë aktivitetet në kalendarin artistik të Teatrit Kombëtar të Operas, Baletit e Ansamblit Popullor, këtë tetor.
Ndër tinguj që frymojnë melankolinë e vjeshtës, kalendari artistik i muajit tetor sjell një mozaik emocionesh.
TKOBAP do të sjellë për publikun e tij nga Festivali Ndërkombëtar i Kërcimit me shfaqje si PULS, Notte Morricone, Alegorías dhe Bate Fado, tek aktivitetet për fëmijë me projektin “Eja këndo me ne”.
Duhen veçuar edhe recitalet: “From Bach to Blues”, koncerti i pianistes, Frida Bollani, dhe duo violonçel-piano me Ejona Nakon e Viola Paçon.
Më 9 tetor adhuruesit e muzikës klasike do të mund të shohin premierën absolute të violinistit të shquar Giuseppe Gibboni me Orkestrën Simfonike të TKOBAP-së.
Në 18 tetor do të shfaqet mbrëmja gala dedikuar regjisorit Nikolin Gurakuqin, në 70-vjetorin e lindjes, ndërkohë që vlen të përmendet përfaqësimi ndërkombëtar i Ansamblit në Bolzano e Rovereto si edhe debutimi i Orkestrës Simfonike në Respighi Festival Bologna.
Fundi i muajit tetor do të sjellë në Tiranë Orkestrën Filarmonike të Vjenës, për të festuar 200-vjetorin e kompozitorit austriak, Johan Shtraus (Johann Strauss).