Përmeti feston ditën e Teqesë së Frashërit, një nga monumentet më të rëndësishme me vlera kulturore, historike dhe fetare në Shqipëri. Teqeja e Frashërit, e ndërtuar më 1781 nga Sulejman Beu i Frashërit, nuk lidhet vetëm me bektashizmin, por ka luajtur një rol kyç në zhvillimin e arsimit shqip në rrethin e Përmetit.
Në vitin 1908, këtu u hap shkolla e parë shqipe, ku mësimi i gjuhës shqipe dhe edukimi i rilindasve e bënë teqenë një vatër të rëndësishme atdhetare. Ky monument kulture, që mori këtë status në 1973, vazhdon të tërheqë vizitorë vendas dhe të huaj për vlerat e tij shpirtërore dhe historike.
Teqeja përbëhet nga dy ndërtesa të veçanta të lidhura me një mur:
- Ndërtesa e sipërme, me formën “L”, përfshin Kafe Oxhaku, Ashefi dhe Furra e Bukës.
- Ndërtesa e poshtme, pjesërisht dykatëshe, përmban Mejdanin, vendi i shenjtë ku zhvilloheshin ceremonitë fetare dhe mësimi bektashian.