Reshjet e dendura të ditëve të fundit kanë shkaktuar përmbytje masive në disa rajone të Spanjës, duke detyruar autoritetet të shpallin gjendjen e emergjencës.
Qindra persona kanë mbetur të bllokuar në shtëpitë e tyre dhe në automjete, kryesisht në rajonin verilindor të Katalonjës, ku rrëke të fuqishme uji dhe balte kanë përfshirë qytetet La Ràpita dhe Santa Bàrbara në provincën e Tarragonës.
Agjencia kombëtare e motit AEMET ka shpallur alarmin e kuq në zonat bregdetare, për shkak të rrezikut të lartë nga përmbytjet dhe erërat e forta. Deri më tani nuk raportohet për viktima apo të lënduar.
Ndërkohë, Agjencia e Mbrojtjes Civile e Katalonjës u ka bërë thirrje banorëve në Deltën e Ebros që të shmangin lëvizjet e panevojshme, pasi parashikohet një përkeqësim i mëtejshëm i motit në orët në vijim.
Për shkak të kushteve ekstreme atmosferike, nisjet e trenave nga qytetet e Barcelonës dhe Valencias janë pezulluar deri në një njoftim të dytë.