LIBRAZHD –9 prill 2026/Albania Express News/ Një nga figurat më të përkushtuara të shërbimit shëndetësor në Librazhd, infermierja Mimoza Shebeku, ka mbyllur me dinjitet një rrugëtim të gjatë profesional prej 39 vitesh në reanimacionin e kirurgjisë pranë Spitalit të Librazhdit, duke dalë në pension.
Lajmi është bërë i ditur nga Drejtoria e Shërbimit Spitalor Librazhd përmes një postimi në rrjetet sociale, ku vlerësohet kontributi i saj i vyer ndër vite. E njohur për përkushtimin, durimin dhe humanizmin, Shebeku ka qenë një mbështetje e pazëvendësueshme për pacientët dhe një shembull frymëzimi për kolegët.
“Me kujdesin dhe profesionalizmin e saj, Mimoza Shebeku i dha profesionit jo vetëm dijen, por edhe zemrën, duke lënë gjurmë të pashlyeshme në jetët e shumë njerëzve”, thuhet në mesazhin e institucionit.
Drejtoria e spitalit e falënderon për çdo sakrificë dhe për çdo buzëqeshje që ka sjellë shpresë në momentet më të vështira, ndërsa i uron një pension të qetë, plot shëndet dhe gëzim.
Pas një karriere të gjatë në shërbim të jetës, Mimoza Shebeku mbetet një simbol i përkushtimit dhe humanizmit në sistemin shëndetësor lokal.