Sot ka nisur faza e parë e regjistrimeve për kandidatët fitues në raundin e dytë të Maturës Shtetërore. Gjimnazistët që nuk arritën të përfitojnë në raundin e parë kanë kështu një mundësi të fundit për të siguruar një vend në programet e studimit që ende kanë kuota të lira.
Në një njoftim zyrtar, Universiteti i Tiranës bëri të ditur se periudha e regjistrimeve për raundin e dytë zhvillohet nga 29 shtatori deri më 8 tetor 2025. Ky raund do të ketë pesë faza 48-orëshe, sipas kalendarit:
-
Faza e parë: 29 – 30 shtator
-
Faza e dytë: 1 – 2 tetor
-
Faza e tretë: 3 – 4 tetor
-
Faza e katërt: 5 – 6 tetor
-
Faza e pestë: 7 – 8 tetor
Të gjithë kandidatët fitues duhet të paraqiten pranë sekretarive mësimore të fakulteteve përkatëse me dokumentacionin e nevojshëm për të përfunduar procesin e regjistrimit.
Raundi i parë i regjistrimeve u zhvillua nga 29 gusht deri më 11 shtator, i ndarë në shtatë faza 48-orëshe.
Universiteti i Tiranës, me 164 programe studimi dhe një staf akademik të kualifikuar, garanton formimin profesional dhe shkencor të studentëve, duke i përgatitur ata për tregun e punës dhe karrierën e ardhshme.
