Në një takim me studentët e Universitetit “Aleksandër Moisiu” në Durrës, kreu i SPAK, Altin Dumani, theksoi se lufta kundër korrupsionit nuk është vetëm përgjegjësi e SPAK-ut, por një detyrë që duhet të përfshijë të gjitha institucionet dhe vetë shoqërinë.
Ai u shpreh se, ndonëse SPAK është krijuar vetëm prej pak vitesh, sot funksionon plotësisht dhe ka arritur rezultate konkrete.
Para pedagogëve dhe studentëve, Dumani pranoi se gjatë këtyre viteve janë hasur sfida dhe problematika, por shtoi se bilanci i punës është i prekshëm dhe i matshëm. Ai nënvizoi se SPAK ka ngritur akuza ndaj personave me peshë të rëndësishme politike, kryetarë bashkish, deputetë dhe deri te ministra. Sipas tij, ajo që ka më shumë rëndësi është fakti se për rreth 50% të personave ndaj të cilëve janë ngritur akuzat, gjykatat kanë dhënë tashmë vendime.
Në përfundim të mandatit të tij, Dumani u shpreh i kënaqur me arritjet e institucionit që ka drejtuar. Të martën e ardhshme, ai do t’i dorëzojë detyrën Klodian Brahos, i cili do të marrë drejtimin e SPAK për tre vitet në vijim.
Organizuar nga Komiteti i Helsinkit dhe BE, takimi me studentët e UAMD u zhvillua në kuadër të bashkëbisedimit me temë “Lufta kundër korrupsionit”