GRAMSH ,18 korrik 2026/Albania Express News/-Një lajm që mbush me krenari jo vetëm Gramshin, por mbarë Shqipërinë. Melodia karakteristike e Fyejve të Gramshit, një prej trashëgimive më të veçanta të folklorit shqiptar, ka kapërcyer kufijtë dhe është bërë pjesë e kolonës zanore të filmit “The Odyssey”, duke sjellë tingujt autentikë të kulturës sonë në një prodhim të kinematografisë botërore.
Për herë të parë, jehona e këtij instrumenti tradicional, i cili prej brezash ka shoqëruar jetën dhe traditat e banorëve të zonës së Gramshit, do të dëgjohet në një produksion të Hollivudit. Ky është një vlerësim i jashtëzakonshëm për pasurinë shpirtërore dhe muzikore shqiptare, duke dëshmuar se identiteti ynë kulturor ka potencial të prekë skenat më prestigjioze ndërkombëtare.
Për banorët e Gramshit, ky është një moment historik. Fyejt, që për dekada kanë qenë simbol i traditës dhe i folklorit të zonës, tashmë marrin një dimension të ri, duke u bërë pjesë e një vepre artistike me jehonë globale.
Ky sukses shihet edhe si një hap i rëndësishëm drejt njohjes më të gjerë të kësaj vlere kulturore. Shumë artistë dhe studiues të trashëgimisë kulturore shprehen se, pas këtij momenti në Hollivud, synimi i radhës duhet të jetë përfshirja e Fyejve të Gramshit në listën e trashëgimisë kulturore jomateriale të UNESCO-s.
“Sot në Hollivud, nesër shpresojmë në UNESCO!” – është mesazhi që po shoqëron këtë arritje, duke reflektuar dëshirën që kjo pasuri unike shqiptare të marrë edhe vlerësimin ndërkombëtar që meriton.
Nga malet e Gramshit deri në ekranet e mëdha të botës, tingujt e fyejve shqiptarë po dëshmojnë se kultura jonë është një thesar me vlera universale, i denjë për t’u dëgjuar dhe vlerësuar kudo.