KOSOVË ,15 korrik 2026/Albania Express News/-FC Malisheva ka shkruar një nga faqet më të bukura të historisë së saj në arenën ndërkombëtare, duke siguruar kualifikimin në raundin e dytë të UEFA Conference League pas një fitoreje të jashtëzakonshme 5-0 ndaj Vllaznisë së Shkodrës në ndeshjen e kthimit, të zhvilluar në Kampin Nacional në Hajvali.
Skuadra kosovare përmbysi në mënyrë spektakolare disavantazhin 2-1 të ndeshjes së parë në Shkodër, duke dhuruar një paraqitje mbresëlënëse dhe duke dominuar plotësisht përballjen. Me karakter, disiplinë taktike dhe efikasitet në sulm, Malisheva nuk i la asnjë mundësi kundërshtarit, duke vulosur kalimin në fazën tjetër me rezultatin e përgjithshëm 6-2.
Futbollistët e Malishevës zhvilluan një ndeshje për t’u mbajtur mend, ndërsa mbështetja e tifozëve në Hajvali u kthye në një shtysë të rëndësishme drejt këtij suksesi historik. Kjo fitore konfirmon rritjen e vazhdueshme të futbollit kosovar dhe potencialin e klubeve të Kosovës për të konkurruar me dinjitet në garat evropiane.
Pas ndeshjes, urimet nuk munguan për klubin, futbollistët, stafin teknik dhe drejtuesit, të cilët u vlerësuan për punën dhe përkushtimin që sollën këtë kualifikim të rëndësishëm.
Tashmë FC Malisheva do të vijojë aventurën evropiane në raundin e dytë të UEFA Conference League, me synimin për të vazhduar surprizën dhe për të përfaqësuar sa më denjësisht futbollin e Kosovës në skenën ndërkombëtare.
