Alex Márquez ka triumfuar në Çmimin e Madh të Malajzisë, duke shënuar fitoren e tij të tretë për këtë sezon, pas suksesit në Jerez dhe Montmelò.
Piloti i Gresini Racing mori kryesimin që në xhiron e dytë dhe e mbajti deri në fund, duke regjistruar një fitore bindëse dhe pa rivalë, që e rikthen fuqishëm në qendër të vëmendjes në garën për klasifikimin e përgjithshëm.
Pas tij, në podium u ngjitën bashkatdhetarët Pedro Acosta (KTM Factory) dhe Joan Mir (Honda Factory), të cilët zhvilluan një duel të fortë për vendin e dytë, por pa mundur ta rrezikojnë Márquezin.
Ndërkohë, kampioni në fuqi Francesco Bagnaia, fitues i garës Sprint një ditë më parë, u detyrua të tërhiqej pas një shpimi në gomën e pasme të Ducati-t, duke humbur një shans të artë për podium.
Përfitues doli Marco Bezzecchi, i cili pas përfundimit të garës u ngjit në vendin e tretë, ndonëse performanca e tij mbeti larg pritshmërive.
Në vijim të renditjes, Franco Morbidelli (Ducati VR46) përfundoi i katërti, i ndjekur nga Fabio Quartararo (Yamaha Factory) dhe Fabio Di Giannantonio (Ducati Giallo).
Top 10-shen e plotësuan Enea Bastianini (KTM Tech3), Brad Binder dhe Luca Marini (Honda Factory), por të gjithë me diferencë të ndjeshme nga podiumi.
Një tjetër moment i vështirë shënoi Fermin Aldeguer, i cili pas një rrëzimi u detyrua të tërhiqej nga gara teksa ndodhej në vendin e tetë.
Ndërsa Marco Bezzecchi, një nga pretendentët për titull, nuk arriti të shkëlqejë dhe e mbylli garën në vendin e 12-të, duke ruajtur megjithatë vendin e tretë në klasifikimin e përgjithshëm të botërorit.
Pilotët italianë Lorenzo Savadori dhe Michele Pirro nuk arritën të siguronin pikë, duke përfunduar në vendin e 16-të dhe 17-të përkatësisht.