Ministrja e Turizmit dhe Mjedisit, Mirela Kumbaro, njoftoi se muaji gusht 2025 u mbyll me 10% më shumë vizitorë të huaj krahasuar me të njëjtën periudhë të vitit të kaluar.
Gjatë panelit të Konferencës së Ambasadorëve “Diplo 2025”, Kumbaro i cilësoi turistët e huaj si “ambasadorë bio”, që promovojnë Shqipërinë dhe produktet e saj natyrore gjatë gjithë kohës.
Ministrja theksoi se turizmi dhe mjedisi nuk mund të ndahen, pasi zhvillimi i qëndrueshëm turistik kërkon gjithmonë mbrojtjen e mjedisit. “Shqipëria po ruan ekuilibrin mes turizmit dhe mjedisit, që sot shërben si instrument pozitiv për promovimin e turizmit”, u shpreh Kumbaro.
Sipas saj, turisti i ri ka një profil të ndryshëm: fokus në energji të gjelbër, konsum të qëndrueshëm dhe eksperienca bio. Për shembull, mënyrat e udhëtimit, përdorimi i energjisë, dhe aksesimi i shërbimeve që respektojnë mjedisin janë vendimtare për këtë segment të turistëve.
Shifrat tregojnë rritje të vizitorëve nga tregje të ndryshme: Brazili +16%, Kili +18%, Meksika +11% për gusht 2025. Ministrja Kumbaro nënvizoi se vizitorët e huaj janë një pjesë e rëndësishme e zhvillimit turistik dhe ekonomisë së kënaqësisë.