TIRANË ,16 korrik 2026/Albania Express News/-Bllokim auditimesh, rekomandime të pazbatuara dhe problematika me regjistrimin e pronave. Raporti i Kontrollit të Lartë të Shtetit për Agjencinë Shtetërore të Kadastrës ka rikthyer në qendër të vëmendjes debatin mbi funksionimin e këtij institucioni dhe nivelin e kontrollit mbi administrimin e pronave publike e private.
Alarmi u ngrit fillimisht pas deklaratave të kreut të Kontrollit të Lartë të Shtetit, Arben Shehu, i cili bëri të ditur para deputetëve se për afro dy vite KLSH nuk kishte mundur të zhvillonte një auditim të plotë në Agjencinë Shtetërore të Kadastrës, duke e cilësuar situatën si problem për funksionimin normal të kontrollit kushtetues.
Raporti zyrtar i KLSH-së evidenton një sërë problematikash në zbatimin e rekomandimeve të lëna nga auditimet. Sipas dokumentit, nga 359 rekomandime të dhëna, 98 për qind janë pranuar nga strukturat përkatëse, por zbatimi në praktikë rezulton shumë i ulët.
Nga të dhënat e raportit rezulton se vetëm 18.5 për qind e masave organizative janë zbatuar, ndërsa për administrimin e fondeve financiare niveli i zbatimit është vetëm 4.7 për qind. Edhe më problematik paraqitet zbatimi i masave për përgjegjësi administrative, ku vetëm 0.7 për qind e masave disiplinore janë ekzekutuar.
KLSH thekson se në shumë raste rekomandimet kanë mbetur vetëm në dokumente, pa u shoqëruar me masa konkrete, plane veprimi apo përgjegjësi të përcaktuara.
Problematikat shfaqen në disa drejtori të rëndësishme të Kadastrës. Në Drejtorinë Tirana Veri, sipas raportit, pjesa më e madhe e rekomandimeve organizative dhe masave disiplinore nuk janë zbatuar. Në Tirana Rurale II, një numër i konsiderueshëm rekomandimesh për administrimin e fondeve dhe masave disiplinore kanë mbetur pa zbatim. Të njëjtat konstatime janë evidentuar edhe në drejtoritë e tjera të audituara, përfshirë Tirana Jug, Tirana Rurale I dhe Kamëz–Vorë.
Një tjetër shqetësim i ngritur nga KLSH lidhet me vonesat në regjistrimin e vendimeve gjyqësore dhe vendimeve të Agjencisë së Trajtimit të Pronës. Sipas raportit, 27 mijë e 23 vendime vijojnë të mos jenë të regjistruara, ndërsa çështjet e pronësisë përbëjnë një përqindje të lartë të ankesave të qytetarëve.
Audituesit kanë evidentuar gjithashtu raste problematike në lidhje me tjetërsimin e pronave përmes dokumenteve dhe firmave të dyshuara si të falsifikuara, veçanërisht në zonat bregdetare, ku interesat ekonomike për pronat janë të larta.
Ndërkohë, çështjet e administrimit të pronave janë prej kohësh në fokus edhe të strukturave të drejtësisë. Prokuroria e Posaçme (SPAK) ka zhvilluar hetime për raste që lidhen me prona, legalizime dhe regjistrime të dyshuara të paligjshme, përfshirë veprime hetimore në zona me interes të lartë turistik.
Raporti i KLSH-së ka rikthyer pyetjet mbi përgjegjësinë institucionale dhe nevojën për një kontroll më të thelluar mbi mënyrën se si menaxhohen dosjet e pronave në Shqipëri.
Tashmë pritet të shihet nëse gjetjet e auditimit do të shoqërohen me hapa të mëtejshëm institucionalë dhe nëse organet e drejtësisë do të ndërmarrin verifikime mbi përgjegjësitë konkrete të drejtuesve dhe strukturave që kanë pasur detyrimin për zbatimin e rekomandimeve.
Kadastra mbetet një nga institucionet më të ndjeshme në vend, pasi lidhet drejtpërdrejt me pronën, investimet dhe sigurinë juridike të qytetarëve.