Izraeli dhe Hamasi kanë rënë dakord për fazën e parë të planit të propozuar nga Shtetet e Bashkuara, që synon t’i japë fund luftës në Rripin e Gazës. Lajmi u konfirmua nga kryeministri izraelit Benjamin Netanyahu, i cili e përshëndeti marrëveshjen si një moment historik për vendin.
“Një ditë e madhe për Izraelin. Sot do të mbledh qeverinë për të miratuar marrëveshjen dhe për të sjellë të gjithë pengjet tona të dashura në atdheun e tyre”, deklaroi Netanyahu.
Kryeministri izraelit shprehu gjithashtu mirënjohje për forcat e armatosura dhe shërbimet e sigurisë që, sipas tij, kanë luajtur një rol vendimtar në arritjen e kësaj marrëveshjeje.
“Falënderoj ushtarët e guximshëm të Forcave Mbrojtëse të Izraelit dhe të gjitha forcat e sigurisë. Falë guximit dhe sakrificës së tyre kemi arritur në këtë ditë,” shtoi Netanyahu.
Kjo marrëveshje shihet si një hap i rëndësishëm drejt ndalimit të përplasjes së përgjakshme që ka shkaktuar mijëra viktima dhe shkatërrime të mëdha në Gaza, ndërsa pritet të pasohet nga faza të tjera të planit për paqe të qëndrueshme.
