Muaji shtator ka nisur me diell, dhe plazhet e Himarës janë mbushur me turistë vendas dhe të huaj. Kreu i bashkisë, Vangjel Tavo, publikoi pamje nga bregdeti i qytetit, duke treguar fluksin e madh të pushuesve. “Shtatori ka nisur me diell, qytetarë e turistë vazhdojnë të shijojnë plazhet e Himarës”, shkroi ai në rrjetet sociale.
Himara regjistron edhe këtë sezon turistik një rritje të vizitorëve, falë plazheve me ujë të kristaltë dhe atraksioneve historike si Kalaja e qytetit.
Kalaja e Himarës ka përfunduar së fundmi ndriçimin dekorativ, duke i dhënë monumentit mbi 3500-vjeçar një pamje më madhështore. Ministri i Ekonomisë, Kulturës dhe Inovacionit, Blendi Gonxhja, vlerësoi këtë investim si një shtesë që rrit vlerën turistike të Himarës. Turistët e huaj kanë theksuar bukurinë e natyrës dhe historinë e pasur të qytetit, duke e bërë Himarën një destinacion të veçantë në Riviere.