Pas shtatë muajsh pune intensive, Cërriku ka sot një qendër të re që simbolizon kujdes, solidaritet dhe përfshirje. Është inauguruar Qendra Komunitare Multifunksionale – një hapësirë e krijuar për t’u shërbyer fëmijëve, të rinjve, grave e burrave, duke vënë në qendër familjet më të cënueshme të komunitetit.
Në ceremoninë e hapjes mori pjesë edhe kryetari i komanduar i Bashkisë Cërrik, Florenc Doka, i cili e cilësoi këtë investim si një gur themeli për forcimin e shërbimeve sociale në qytet. Prania e tij ishte një mesazh i qartë për rëndësinë që bashkia i jep kujdesit ndaj njerëzve në nevojë dhe ndërtimit të një shoqërie më të barabartë.
Qendra nuk është vetëm një godinë e re, por një model i ri mbështetjeje. Ajo do të ofrojë shërbime të integruara që ndihmojnë familjet në nevojë të gjejnë mbështetje, trajnim, këshillim dhe mundësi konkrete për t’u integruar në jetën shoqërore e ekonomike.
Ky investim u realizua në kuadër të programit #EU4SocialCare, të financuar nga Bashkimi Evropian dhe të zbatuar nga UNICEF dhe World Vision, me mbështetjen e partnerëve Help dhe Skills. Një shembull i qartë se bashkëpunimi dhe solidariteti japin fryte të prekshme për komunitetet lokale.
albaniaexpress.al
