Ministri i Turizmit, Kulturës dhe Sportit, Blendi Gonxhja ka njoftuar shpalljen e zonave të para malore me përparësi zhvillimi ekonomik në qarqet Shkodër, Mat dhe Shijak, një hap që ai e cilësoi si strategjik për nxitjen e investimeve dhe zhvillimin e qëndrueshëm të këtyre territoreve.
Sipas ministrit Gonxhja, rreth 5300 hektarë tokë do të jenë tashmë të dedikuara për zbatimin e projekteve dhe investime që synojnë turizmin gjithëvjetor, agroturizmave, sporteve të aventurës dhe forcimit të ekonomisë lokale malore.
Ai theksoi se ky proces është nisur në bashkëpunim mes Ministrisë së Ekonomisë, Kulturës dhe Inovacionit dhe Ministrit të Shtetit për Pushtetin Vendor, duke nënvizuar se tashmë puna po konkretizohet me hapa të matshëm në terren.
Ministri u shpreh se “Paketa e Maleve” po krijon bazat për zhvillim rural dhe turizëm të qëndrueshëm, duke hapur rrugën për investime të reja në: sporte dimërore, shtigje dhe aktivitete alpinizmi, aktivitete rekreative që sjellin vizitorë gjatë gjithë vitit.
“Këto investime pritet të japin energji të re ekonomisë së zonave malore, të rrisin përfshirjen e komuniteteve vendase, të sigurojnë zhvillim të balancuar territorial dhe të forcojnë konkurrencën turistike të Shqipërisë në rajon”, u shpreh Gonxhja.