TIRANË, 08 shtator 2026 /Albania Express News/ – Deputetja e Elbasanit, Evis Kushi, është zgjedhur nënkryetare e re e Kuvendit të Shqipërisë, pas propozimit të bërë nga Grupi Parlamentar i Partisë Socialiste.
Propozimi për emërimin e Kushit në këtë detyrë u bë nga kreu i Grupit Parlamentar të PS-së, Taulant Balla, i cili e prezantoi deputeten si kandidaturën e mazhorancës për postin e nënkryetares së Kuvendit.
Kushi zëvendëson në këtë funksion Klodiana Spahiun, e cila është propozuar dhe më pas ka marrë detyrën e ministres së Shëndetësisë dhe Mirëqenies Sociale, pas largimit nga posti të Evis Salës.
Pas zhvillimit të procedurës së votimit në Kuvend, Evis Kushi mori zyrtarisht detyrën e nënkryetares së Kuvendit.
Kushi, e cila përfaqëson Elbasanin në Kuvend, rikthehet kështu në një nga postet drejtuese të institucionit ligjvënës, duke marrë një rol të rëndësishëm në drejtimin e punimeve parlamentare dhe përfaqësimin e Kuvendit.
Ndryshimet në drejtimin e Kuvendit dhe në kabinetin qeveritar vijnë në kuadër të riorganizimeve të fundit në strukturat drejtuese të mazhorancës.