ELBASAN, 28 gusht 2026 / Albania Express News/ – Vihet në pranga në Elbasan shtetasi Behxhet Bylyku, 41 vjeç, pasi dyshohet se ka kanosur me një send të ngjashëm me armë zjarri katër punonjës të Forcës Operacionale të DVP Elbasan.
Ngjarja ka ndodhur në lagjen “Visarion Xhuvani”, gjatë kontrolleve dhe veprimeve operacionale të Policisë për kapjen e vëllait të tij, B. B., i cili është shpallur në kërkim për veprën penale “Mbajtja pa leje dhe prodhimi i armëve, armëve shpërthyese dhe municionit”.
Sipas Policisë, specialistët e Hetimit të Krimeve të DVP Elbasan, në bashkëpunim me oficerët e Policisë Gjyqësore të Prokurorisë, kanë arrestuar në flagrancë 41-vjeçarin.
Gjatë kryerjes së kontrolleve, Behxhet Bylyku dyshohet se ka kanosur me një armë të dyshuar manovër katër punonjës të Forcës Operacionale, të cilët ishin angazhuar në operacionin për lokalizimin dhe kapjen e vëllait të tij.
Në vijim të veprimeve policore, është sekuestruar edhe sendi i ngjashëm me armën e zjarrit.
Ndërkohë, Policia vijon intensivisht kontrollet për kapjen e shtetasit B. B., i cili mbetet në kërkim.
Materialet procedurale i janë referuar Prokurorisë për veprime të mëtejshme ndaj Behxhet Bylykut, i cili dyshohet për veprat penale “Kanosja për shkak të detyrës” dhe “Mbajtja pa leje dhe prodhimi i armëve, armëve shpërthyese dhe municionit”.
Hetimet për zbardhjen e plotë të rrethanave të ngjarjes dhe kapjen e personit të shpallur në kërkim vijojnë.
