RROGOZHINË, 20 shtator 2026 /Albania Express News/- Egnatia është rikthyer te fitorja në kampionat, pasi mposhti 2-1 Partizanin në javën e pestë të Superiores.
Kampionët e Shqipërisë reaguan pas humbjes së javës së kaluar ndaj AF Elbasanit, duke marrë tri pikë të rëndësishme përballë një Partizani që pësoi disfatën e dytë radhazi në kampionat.
Egnatia e zhbllokoi takimin në minutën e 31-të. Loukili dërgoi topin në rrjetë, duke kaluar vendasit në avantazh dhe duke i dhënë skuadrës së Rrogozhinës epërsinë 1-0.
Kampionët vijuan të kontrollonin ritmin e ndeshjes dhe në minutën e 71-të gjetën edhe golin e dytë. Albanese realizoi për 2-0, duke e vendosur Egnatian në pozita shumë të favorshme.
Partizani reagoi menjëherë dhe vetëm dy minuta më vonë, në të 73-tën, Murataj ngushtoi diferencën në 2-1.
Në minutat e fundit, të kuqtë u përpoqën të gjenin golin e barazimit, por Egnatia u mbrojt mirë dhe arriti ta ruajë avantazhin deri në vërshëllimën përfundimtare.
Kjo është humbja e dytë radhazi për Partizanin në kampionat, pas disfatës së javës së kaluar, ndërsa Egnatia merr një fitore që i rikthen besimin skuadrës së kampionëve.
Partizani tashmë do të përqendrohet te derbi i kryeqytetit ndaj Tiranës, i programuar për t’u zhvilluar më 11 tetor.
REZULTATI
Egnatia 2-1 Partizani
⚽ 31’ Loukili, 71’ Albanese / 73’ Murataj