Pas prezantimit të ministres së re të Shëndetësisë dhe Mirëqenies Sociale, Prof. Dr. Evis Sala, Kryeministri Edi Rama vizitoi sot pavionin e ri të kardiokirurgjisë pranë Qendrës Spitalore Universitare “Nënë Tereza” (QSUT), një investim modern që synon të ofrojë shërbime mjekësore të avancuara për pacientët.
Në këtë vizitë morën pjesë gjithashtu ish-ministrja e Shëndetësisë Albana Koçiu, drejtori i përgjithshëm Florenc Spaho, si dhe stafi i mjekëve të specializuar pranë QSUNT. Pavioni i ri do të jetë i pajisur me aparatura moderne dhe ekipe të kualifikuara për trajtimin e zemrës, enëve të gjakut dhe shërbimeve të reanimacionit.
Godina e re ka një sipërfaqe ndërtimi prej 4.000 metra katrorë, me një shtesë prej 500 metra katrorë. Në katin e parë do të ofrohen kryesisht shërbime për studentët dhe stafet pedagogjike, për ngritjen e kapaciteteve dhe logjistikën teknike. Në katin e dytë do të kryhen shërbime të kirurgjisë vaskulare, ndërsa në katin e tretë ndodhet blloku operator me pesë salla operatore, së bashku me shërbimin e reanimacionit për trajtime të specializuara dhe situata emergjente.
Ky investim i rëndësishëm synon të modernizojë sektorin e kardiokirurgjisë dhe të përmirësojë nivelin e shërbimeve ndaj qytetarëve, duke krijuar kushte optimale për trajtimin e pacientëve dhe ngritjen e kapaciteteve të stafit mjekësor.