Verdheblutë kanë gjetur vazhdimësi në shënimin e golave falë kontributit të dy lojtarëve kryesorë në sulm, të cilët po mbajnë peshën kryesore të realizimeve këtë sezon.
Dopieta e realizuar në sfidën e fundit ndaj Dinamos ka bërë që Ibrahima Diallo të ngjitet në kuotën e shtatë golave në kampionat, duke barazuar Tsague në krye të listës së golashënuesve të Elbasanit.
Një statistikë që tregon qartë rëndësinë e tyre në lojën ofensive të skuadrës dhe ndikimin direkt në rezultatet e deritanishme.
Ky barazim në shifra ka krijuar një rivalitet sportiv mes dy lojtarëve, të cilët po konkurrojnë për statusin e realizatorit kryesor të verdhebluve.
Megjithatë, në kampin elbasanas kjo konkurrencë shihet si pozitive, pasi të dy lojtarët shtyjnë njëri-tjetrin për të dhënë maksimumin në çdo ndeshje.
Stafi teknik e konsideron këtë situatë si një plus për skuadrën, pasi rrit alternativat në fazën sulmuese dhe mban nivelin e konkurrencës të lartë.
Me Diallon dhe Tsaguen në formë, Elbasani synon të përfitojë sa më shumë nga ky rivalitet në vazhdimësinë e kampionatit.