Elbasan, 1 shtator 2026 / Albania Express News/ – Drejtuesi i Parë Kastriot Skënderaj është prezantuar zyrtarisht në detyrën e Drejtorit të Drejtorisë Vendore të Policisë Elbasan.
Ceremonia e prezantimit u zhvillua në ambientet e Drejtorisë Vendore të Policisë Elbasan, në prani të Zëvendësdrejtorit të Përgjithshëm të Policisë së Shtetit, Drejtuesit të Lartë Sokol Bizhga, Drejtuesit Fatmir Hoxha, si dhe drejtuesve të strukturave në varësi të DVP Elbasan.
Gjatë ceremonisë, Zëvendësdrejtori i Përgjithshëm i Policisë së Shtetit, Sokol Bizhga, vlerësoi punën dhe kontributin e Fatmir Hoxhës gjatë periudhës së drejtimit të Drejtorisë Vendore të Policisë Elbasan.
Në vijim, Bizhga vlerësoi përvojën profesionale të Drejtuesit të Parë Kastriot Skënderaj, duke shprehur besimin se eksperienca e tij do të vihet në funksion të përmbushjes me sukses të detyrave në krye të Policisë së Elbasanit.
Sipas tij, prioritetet kryesore do të lidhen me garantimin e rendit dhe sigurisë publike, luftën kundër kriminalitetit dhe forcimin e parametrave të sigurisë në të gjithë territorin e qarkut.
Hoxha: Suksese drejtuesit të ri
Gjatë fjalës së tij, Drejtuesi Fatmir Hoxha falënderoi drejtuesit dhe punonjësit e Drejtorisë Vendore të Policisë Elbasan për bashkëpunimin dhe mbështetjen gjatë periudhës së ushtrimit të detyrës.
Hoxha i uroi sukses drejtuesit të ri të DVP Elbasan, duke i përcjellë urimet për përmbushjen me sukses të përgjegjësive në funksion të rendit dhe sigurisë publike.
Skënderaj: Do të punoj me përkushtim dhe integritet
Në fjalën e tij, Drejtuesi i Parë Kastriot Skënderaj shprehu mirënjohjen për besimin e dhënë dhe theksoi angazhimin e tij për të ushtruar detyrën me përgjegjshmëri dhe profesionalizëm.
Skënderaj deklaroi se do të punojë me përkushtim dhe integritet, duke synuar forcimin e bashkëpunimit me strukturat vendore dhe komunitetin.
“Do të punoj me përkushtim, profesionalizëm dhe integritet, në bashkëpunim me strukturat vendore dhe me komunitetin”, u shpreh Skënderaj, duke nënvizuar objektivin për garantimin e sigurisë dhe rritjen e besimit të qytetarëve te Policia e Shtetit.
Me marrjen e detyrës së re, Kastriot Skënderaj do të drejtojë strukturat vendore të Policisë së Shtetit në Qarkun Elbasan, me përgjegjësi për menaxhimin e situatës së rendit dhe sigurisë, parandalimin dhe goditjen e kriminalitetit, si dhe forcimin e bashkëpunimit me komunitetin dhe institucionet vendore.
