Deputetja e Partisë Demokratike për Qarkun e Elbasanit, Klodiana Çapja, ka reaguar ashpër pas zhvillimit të Samiti i Diasporës, duke ngritur një sërë shqetësimesh mbi mënyrën e organizimit dhe përfaqësimit në këtë aktivitet.
Në një postim në rrjetet sociale, Çapja e cilëson përjashtimin e Komisionit për Kulturën, Turizmin dhe Diasporën nga samiti si një tregues të qartë të mungesës së transparencës dhe të një qasjeje përjashtuese ndaj opozitës në çështje me rëndësi kombëtare. Sipas saj, një aktivitet i tillë duhet të garantonte përfshirje të gjerë institucionale dhe politike, veçanërisht kur bëhet fjalë për diasporën shqiptare.
Deputetja shprehet se ajo që u pa gjatë aktivitetit ishte edhe më shqetësuese, pasi sipas saj, qytetarë dhe pjesëmarrës ngritën zërin për problematika konkrete me të cilat përballen shqiptarët jashtë vendit. Mes tyre, ajo përmend mungesën e mbështetjes nga institucionet shqiptare, vështirësitë në komunikim dhe perceptimin për “dyer të mbyllura” ndaj emigrantëve.
Në reagimin e saj, Çapja ndalet edhe tek ajo që e cilëson si “propagandë boshe”, duke përmendur rastin e statusit të minatorit, një çështje që sipas saj vijon të mbetet e pazgjidhur pavarësisht premtimeve të përsëritura.
Një tjetër akuzë e fortë lidhet me situatën në Elbasan. Deputetja pretendon se administrata publike është detyruar të marrë pjesë në aktivitet për të mbushur sallën, duke ushtruar presion mbi punonjësit e bashkisë për të udhëtuar drejt Tiranës. Sipas saj, një praktikë e tillë cenon lirinë individuale dhe bie ndesh me parimet e një administrate në shërbim të qytetarëve.
Në përfundim, Klodiana Çapja thekson se samiti, në vend që të shërbente si një platformë reale për përfaqësimin e diasporës, u kthye në një aktivitet me karakter propagandistik, ku sipas saj qytetarët u përdorën për qëllime politike.