Në Institucionin e Presidentit të Republikës u zhvillua sot ceremonia e betimit të qeverisë “Rama 4”, e cila merr mandatimin në një moment historik për Shqipërinë, ku synohet hyrja e vendit në BE. Një nga risitë e kabinetit të ri qeverisës ishte edhe mandatimi i ish-kryebashkiakut të Cërrikut, Andis Salla, si ministër i Bujqësisë dhe Zhvillimit Rural.
Gjashtë vitet në krye të bashkisë Cërrik, si edhe eksperienca si drejtues në institucione të tjera të rëndësishme, ku u dallua për përkushtimin e tij, bënë të mundur që Kryeministri Rama t’i besojë një ndër Ministritë më të rëndësishme.
Pas marrjes së detyrës, ministri Salla falënderoi Kryeministrin për besimin e dhënë dhe theksoi se drejtimi i këtij sektori përbën një përgjegjësi të madhe, pasi lidhet ngushtë me ekonominë, ushqimin dhe mirëqenien e qytetarëve shqiptarë.
Ai u shpreh i vendosur për të çuar përpara vizionin “Bujqësia 2030”, duke e cilësuar atë si një rrugë të qartë për fuqizimin e fermerëve, rritjen e prezencës së produkteve “Made in Albania” në tregjet ndërkombëtare, mbështetjen e agrobizneseve dhe kthimin e politikave në rezultate të prekshme.
“Me transparencë, vendosmëri dhe bashkëpunim me të gjithë aktorët e sektorit, do të punoj që ky mandat të shënojë hapa të qarta drejt një bujqësie moderne, konkurruese dhe europiane,” u shpreh ndër të tjera ministri i ri.
Me këtë angazhim, Salla synon ta shndërrojë bujqësinë në një shtyllë të qëndrueshme dhe të fortë të zhvillimit ekonomik të vendit.
albaniaexpress.al
