Bota e sportit është tronditur nga lajmi se kampioni i botës në boks, Ricky Hatton, i njohur me nofkën “The Hitman”, është ndarë nga jeta në moshën 46-vjeçare. Ai u gjet i vdekur në shtëpinë e tij në Manchester mëngjesin e së dielës, 14 shtator.
Policia e Manchesterit konfirmoi ngjarjen, duke deklaruar se vdekja nuk po trajtohet si e dyshimtë. “Mund të konfirmojmë se kemi gjetur një trup në një adresë në Bowlacre Road në Gee Cross në orën 06:45 të mëngjesit të sotëm. Vdekja nuk po trajtohet si e dyshimtë,” thuhet në deklaratë.
Lajmi ka shkaktuar reagime të shumta në rrjetet sociale dhe në komunitetin sportiv. Fansat dhe figura të njohura, përfshirë Piers Morgan, kanë shprehur ngushëllimet dhe respektin e tyre për Hatton, duke e përshkruar atë si një ikonë të boksit britanik dhe një nga figurat më të dashura të sportit.
Karriera e Hatton zgjati nga 1997 deri në 2012, duke regjistruar 45 fitore dhe vetëm 2 humbje. Ai u përball me emra të njohur si Kostya Tszyu, Paulie Malignaggi, Floyd Mayweather Jr. dhe Manny Pacquiao. I lindur dhe rritur në Manchester, Hatton u bë një figurë e dashur jo vetëm për sukseset e tij në ring, por edhe për shpirtin sportiv dhe karakterin e sinqertë jashtë ringut.