Ekipi i basketbollit i Elbasanit ka siguruar një fitore të thellë dhe mjaft bindëse ndaj Flamurtarit me rezultatin 112–89, duke prerë biletën për në turin tjetër të Kupës. Elbasanasit e kontrolluan ndeshjen që në minutat e para dhe e administruan avantazhin me maturi deri në fund, duke treguar diferencë të qartë cilësore në parket.
Ndeshja nisi me epërsinë e vendasve, të cilët fituan periodën e parë 24–18, ndërsa në të dytën rritën ndjeshëm ritmin, duke e mbyllur 32–21 dhe duke shkuar në pushim me një avantazh të dyshifërt. Flamurtari reagoi në periodën e tretë, të fituar 31–25, por pa arritur të rrezikojë realisht rezultatin e përgjithshëm.
Në 10-minutëshin e fundit, Elbasani rifitoi kontrollin total të lojës dhe me një tjetër periodë të fortë, 31–19, vulosi fitoren përfundimtare 112–89. Diferenca u ndërtua mbi efikasitetin në sulm dhe qarkullimin e shpejtë të topit, elementë që e bënë të vështirë rezistencën e Flamurtarit.
Protagonistë absolutë të këtij suksesi ishin dy amerikanët e Elbasanit, Triplet dhe Uilliams, të cilët dhuruan spektakël në parket me plot 49 dhe 41 pikë respektivisht. Performanca e tyre individuale ishte vendimtare për kualifikimin, duke e konfirmuar Elbasanin si një nga ekipet më ambicioze në këtë edicion të Kupës.