Bashkia Elbasan vijon angazhimin konkret me të rinjtë përmes trajnimit “Ambasadorë të Energjisë për një Elbasan më të Gjelbër”, duke i vendosur ata në qendër të përpjekjeve për transformimin e qëndrueshëm të qytetit.
Kjo nismë zhvillohet në kuadër të projektit GreenElb “Energjia e Gjelbër dhe e Qëndrueshme në Ndërtesat e Elbasanit”, i zbatuar nga Bashkia Elbasan në partneritet me Urban Research Institute dhe me mbështetjen financiare të Komisioni Europian përmes programit NetZeroCities.
Gjatë sesioneve trajnuese, të rinjtë po thellojnë njohuritë mbi Modelin e Standardizuar për Vlerësimin e Performancës së Energjisë në Ndërtesa, duke u përgatitur të jenë promotorë aktivë të nismave që lidhen me rritjen e eficiencës së energjisë, reduktimin e emetimeve, ndërgjegjësimin e komunitetit për sfidat klimatike dhe promovimin e zgjidhjeve të qëndrueshme për zhvillimin e qytetit.
Përmes këtij angazhimi, Bashkia Elbasan forcon vizionin për të udhëhequr tranzicionin e gjelbër si i vetmi qytet në Shqipëri pjesë e Misionit Europian për Neutralitet Klimatik, duke fuqizuar rolin e të rinjve si aktorë kyç në ndërtimin e një Elbasani më të gjelbër, më të qëndrueshëm dhe më të jetueshëm për të gjithë.
