Kombëtarja e Shqipërisë përgatitet për përballjen e nesërme ndaj Serbisë, e vlefshme për kualifikueset e Botërorit 2026. Trajneri Silvinho dhe kapiteni Elseid Hysaj mbajtën sot konferencën e zakonshme për shtyp, duke folur për përgatitjet e ekipit dhe pritshmëritë për ndeshjen.
Pyetur nëse kjo ndeshje mund të konsiderohet më e rëndësishmja, Silvinho tha:
“Të gjitha ndeshjet janë të rëndësishme. Sot është absolutisht e tillë. Një muaj më parë luajtëm me Letoninë, nëse nuk fitonim nuk do kishte sens. Nesër do jetë emblematike dhe e bukur.”
Trajneri foli edhe për stërvitjet e skuadrës dhe përgatitjen e sulmit:
“Kemi pasur stërvitje të vazhdueshme në Tiranë, duke përdorur video dhe duke korrigjuar në fushë. Dje zhvilluam stërvitje të nivelit të lartë. Të gjithë lojtarët janë të gatshëm dhe i janë përgjigjur mirë përgatitjes. Nesër duhet të zgjedhim ekipin që do dalë në fushë.”
Ai komentoi edhe mbi rreshtimin e kundërshtarëve:
“Di si luajnë, me 3 mbrojtës në qendër, 2 mesfushorë, një mëngjerash dhe dy sulmues. Nesër skuadra jonë është gati. Sa i përket surprizave, nuk mund t’i zbuloj, sepse ata dinë shumë.”
Për shanset e fitore, Silvinho u shpreh:
“Futbolli është i paparashikueshëm. Nuk mund të vendosim baste. Kam besim të plotë te skuadra jonë. Secili lojtar është përgatitur dhe mund të japë maksimumin në 90 minutat e ndeshjes. Duhet intensitet, zemër dhe shpirt.”
Ndeshja Shqipëri–Serbi do të zhvillohet nesër në Leskovac, me fillim në ora 20:45.
