Kryetari i Bashkisë së Nju Jorkut, Eric Adams, po zhvillon një vizitë zyrtare në Shqipëri, ku është pritur nga kryeministri Edi Rama.
Gjatë një deklarate të përbashkët për shtyp, Rama tha se bisedimet me Adams do të fokusohen në zhvillimin e turizmit dhe në projektin për hapjen e një linje të re ajrore direkte mes Nju Jorkut dhe Tiranës.
“Kreu i Bashkisë së Nju Jorkut më në fund erdhi për të vizituar Shqipërinë, për të parë nga afër një vend për të cilin ka dëgjuar shumë nga miqtë e tij shqiptarë, por edhe për të diskutuar se çfarë mund të bëjmë së bashku për turizmin,” u shpreh Rama.
Ai shtoi se Adams ka qenë kyç në vendosjen e linjave ajrore direkte të Nju Jorkut me vende të tjera dhe se tashmë po shqyrtohet mundësia për një fluturim të drejtpërdrejtë Nju Jork–Tiranë.
“Duke qenë shumë i interesuar për teknologjinë, kryebashkiaku Adams ka shprehur gjithashtu dëshirën për t’u takuar me Diellën,” shtoi Rama me humor.
