Lëvizja për Zhvillim Kombëtar (LZHK) i është rikthyer propozimit të saj të kahershëm për rikthimin e dënimit me vdekje për krimet më të rënda kundër jetës.
Në një deklaratë për mediat, bashkëkryetari i LZHK-së, Ekrem Spahia, dënoi vrasjen e gjyqtarit Astrit Kalaja dhe kërkoi që institucionet shtetërore të mbajnë përgjegjësi për zvarritjen e çështjeve të pronësisë që, sipas tij, kanë çuar në ngjarje tragjike si ajo e fundit.
“I shprehim ngushëllimet më të thella familjes së gjyqtarit Astrit Kalaja,” deklaroi Spahia. “Kërkojmë që ndaj institucioneve që lidhen me çështjen e pronës së familjes së personit që humbi durimin dhe kreu vrasjen, të ngrihet përgjegjësi ligjore për zvarritjen prej tre dekadash të çështjes së pronave të familjes Shkambi.”
Ai theksoi se LZHK ka propozuar prej kohësh rishikimin dhe ashpërsimin e sanksioneve penale:
“Duhet të shqyrtohet mundësia e vendosjes së përkohshme të dënimit me vdekje për krimet shumë të rënda kundër jetës,” shtoi Spahia.