Partia Demokratike ka njoftuar se nuk do të marrë pjesë në dy komisionet e posaçme që pritet të ngrejë Kuvendi — atë për Reformën Administrative Territoriale dhe Reformën Zgjedhore.
Kreu i PD-së, Sali Berisha, deklaroi se opozita do të bojkotojë punimet e këtyre komisioneve derisa në to të përfshihen ekspertë ndërkombëtarë për të garantuar transparencë dhe besueshmëri në proces.
“Asnjë komision pa përfshirjen e Kongresit të Autoriteteve Territoriale për Reformën Administrative dhe pa ODIHR për Reformën Zgjedhore nuk do të ketë pjesëmarrjen tonë,” u shpreh Berisha. “Të vijnë institucionet ndërkombëtare, të marrim ekspertët nga Komisioni i Venecias, dhe ne jemi të hapur të zbatojmë çdo rekomandim të tyre. Por me Fatmir Xhafën e Damian Gjiknurin, që nuk kanë interes për reforma, nuk mund të bëhet ndryshim i vërtetë. Ata duan të mbajnë pushtetin duke shkatërruar çdo standard.”
