Gjykata e Posaçme Kundër Krimit dhe Korrupsionit ka pushuar padinë për shpifje të ngritur ndaj Flamur Nokës dhe shoqërisë tregtare “3 DS & AF Entertainment sh.p.k.”. Vendimi u mor për shkak të mosparaqitjes së palës së dëmtuar, Gjergji Vishkulli, në seancat gjyqësore pa një arsye të justifikuar.
Padia, e dorëzuar nga Vishkulli, kishte për qëllim deklarimin fajtor të Nokës dhe shoqërisë për shpifje të kryer botërisht, si dhe kërkonte dëmshpërblim për cenimin e nderit, imazhit personal dhe profesional, si dhe përgënjeshtrim të lajmit të publikuar në media.
Sipas vendimit të Gjykatës së Posaçme, për shkak të mosparaqitjes së paditësit, pushohen të gjitha kërkesat, duke përfshirë detyrimin për dëmshpërblim dhe përgënjeshtrim të lajmit. Shpenzimet gjyqësore të kryera deri në këtë moment i ngarkohen palës së dëmtuar. Kundër këtij vendimi, palët kanë të drejtë ankimi në Gjykatën e Posaçme të Apelit për Korrupsionin dhe Krimin e Organizuar brenda 15 ditëve nga komunikimi i vendimit.
