Sot, më 21 Shtator 2025 ndalohet qarkullimi i automjeteve në disa segmente kryesore të qytetit të Elbasanit, në kuadër të aktiviteteve për “Ditën pa Makina”, një iniciativë që synon promovimin e transportit ekologjik, reduktimin e ndotjes dhe përmirësimin e cilësisë së jetës për qytetarët.
Sipas urdhrit të Bashkisë, qarkullimi i automjeteve është ndaluar në:
- Bulevardi “Aqif Pasha”, nga stadiumi “Elbasan Arena” deri te rrethrrotullimi i “1 Majit”, nga ora 08:00 deri në 20:00.
- Rruga “Rinia”, nga universiteti “Aleksandër Xhuvani” deri te kryqëzimi me rrugën “Tomorr Sinani” (Sporti i vjetër), nga ora 08:00 deri në 16:00.
“Dita pa Makina” është një mundësi për qytetarët që të shijojnë qytetin pa zhurmën dhe ndotjen e trafikut, të ecin më shumë në këmbë, të përdorin biçikletat ose transportin publik, dhe të bashkohen në aktivitete sportive dhe rekreative në hapësira publike. Përveç ndikimit pozitiv në mjedis, kjo ditë synon të rrisë ndërgjegjësimin për rëndësinë e transportit ekologjik dhe të ndihmojë qytetarët të krijojnë zakone më të shëndetshme dhe miqësore me natyrën.
albaniaexpress.al