Një delegacion nga Komisioni për Kontrollin Buxhetor i Parlamentit Europian, i kryesuar nga kryetari Niclas Herbst, ka zhvilluar një mision në Mal të Zi dhe Shqipëri për të shqyrtuar masat mbi mbrojtjen e fondeve të BE-së. Eurodeputetët vlerësuan ngritjen e mekanizmave të rinj të kontrollit dhe auditimit në kuadër të Mekanizmit për Reforma dhe Rritje për Ballkanin Perëndimor (RGF), por theksuan se mbeten ende sfida serioze.
Sipas z. Herbst, problemet kryesore lidhen me korrupsionin e rrënjosur, krimin e organizuar, vonesat në projekte infrastrukturore, presionin mbi organet mbikëqyrëse, mungesën e efikasitetit gjyqësor, margjinalizimin e shoqërisë civile dhe keqpërdorimet e fondeve në të kaluarën.
Ai theksoi se RGF është një mundësi historike për rajonin, por suksesin e tij e garanton vetëm një qeverisje e fortë, auditim i pavarur dhe tolerancë zero ndaj mashtrimit. Herbst shprehu bindjen se brenda 2-3 viteve, Shqipëria dhe Mali i Zi do të paraqesin rezultate konkrete, ndërsa Parlamenti Europian do të mbikëqyrë nga afër procesin.