Ambasada e Shteteve të Bashkuara në Prishtinë njoftoi se Uashingtoni ka pezulluar për një kohë të pacaktuar dialogun strategjik me Kosovën, si pasojë e veprimeve të qeverisë së përkohshme që, sipas saj, kanë rritur tensionet dhe paqëndrueshmërinë.
Në komunikatë thuhet se këto zhvillime kanë kufizuar aftësinë e SHBA-së për të bashkëpunuar në mënyrë produktive me Kosovën mbi prioritetet e përbashkëta.
“Shtetet e Bashkuara mbeten të përkushtuara për të çuar përpara interesat e përbashkëta me popullin e Kosovës, duke forcuar paqen, stabilitetin dhe prosperitetin ekonomik. Fatkeqësisht, veprimet dhe deklaratat e fundit të kryeministrit të përkohshëm Albin Kurti kanë paraqitur sfida për progresin e bërë ndër vite”, thuhet në njoftim.
Dialogu strategjik kishte për qëllim thellimin e bashkëpunimit ekonomik dhe diplomatik mes SHBA-së dhe Kosovës.
