Nga Anila Ahmataj
Në një atmosferë të ngrohtë dhe plot emocione, figura e shquar e ekranit shqiptar, Virgjil Kule, u surprizua në mënyrë të veçantë në 73-vjetorin e lindjes së tij. Festimi u organizua dhe u mbajt në fshatin piktoresk të Kaninës, aty ku historia dhe natyra bëhen bashkë për të krijuar një sfond ideal për një surprizë të paharrueshme.
Nën organizimin e regjisorit Ardit Zotaj, kryetarit të fshatit Kaninë, Bareq Sadiraj, dhe gazetares së mirënjohur, Anila Ahmataj, u organizua një festë tradicionale, ku nuk munguan muzika, gatimet vendase dhe përqafimet e ngrohta nga miq të mrekullueshëm. Të ftuarit nderuan jo vetëm ditëlindjen e Virgjil Kulës, por edhe një jetë të tërë të përkushtuar ndaj kulturës dhe medias shqiptare.
“Më dhuruat një kujtim të paharruar,” – u shpreh vetë Kule, me emocion dhe me zërin e tij karakteristik, që brezave u është ngulitur në kujtesë përmes dokumentarëve, kronikave dhe emisioneve të shumta që ai ka realizuar gjatë dekadave të punës.
Virgjil Kule lindi në vitin 1952 dhe studioi për gazetari. Karriera e tij nisi dhe u formësua në Televizionin Shqiptar, ku shërbeu si gazetar, folës dhe më pas si drejtor. Kontributi i tij është i gjerë dhe shumëplanësh: nga drejtimi i televizioneve private e deri te themelimi i një studioje komplekse multimediale, ai ka qenë gjithmonë në pararojë të zhvillimeve mediatike në vend.
Zëri i tij i njohur dhe naracioni i ngrohtë janë dëgjuar në qindra dokumentarë televizivë, ku natyra, kultura, historia dhe njerëzit e zakonshëm janë kthyer në histori që frymëzojnë. Kohët e fundit, ai ka realizuar dokumentarë turistikë për qytetet e Vlorës dhe Sarandës, duke sjellë në ekran bukuritë dhe potencialin turistik të jugut të Shqipërisë.
Përtej kufijve të Shqipërisë, Kule ka udhëtuar nëpër botë si regjisor dokumentarësh dhe misionar i organizatës ndërkombëtare “Mjekët pa Kufij”, duke sjellë në vëmendje realitete të largëta përmes videos me tematika humanitare nga Rusia, Ukraina, Kaukazi dhe Azia Qendrore. Përvoja e tij si konsulent mediatik dhe hartues strategjish komunikimi ka qenë gjithashtu e vlefshme për shumë programe zhvillimi dhe fushata ndërgjegjësuese në vend.
Zotërues i disa gjuhëve të huaja, Kule ka përkthyer edhe vepra letrare në gjuhën shqipe, ndërsa pasionin për historinë, gjeografinë dhe filozofinë e ushqen përmes studimeve dhe botimeve që i dedikohen çështjeve të harmonisë sociale.
Festa në Kaninë nuk ishte thjesht një festim ditëlindjeje, por një moment reflektimi dhe vlerësimi për një jetë të tërë të mbushur me pasion, përkushtim dhe dashuri për fjalën e thënë dhe të shkruar. Në sfondin e kodrave të Kaninës, nën tingujt e muzikës tradicionale dhe praninë e njerëzve që e duan e e respektojnë, kjo ditë u shndërrua në një simbol mirënjohjeje për një njeri që i ka dhënë shumë ekranit dhe kulturës shqiptare.
Virgjil Kule mbetet një zë i rëndësishëm i historisë moderne të medias në Shqipëri, një zë që flet për të kaluarën, por që frymëzon të tashmen dhe të ardhmen. Virgjil Kule njihet nga të gjithë si ikona e RTSH-së, pasi zëri i tij gjatë transmetimit të lajmeve ka qenë gjithmonë i vlerësuar, për shkak edhe të ngjyrimit të veçantë në armatën e folësve të televizioneve shqiptare.
Virgjil Kule do të mbahet mend jo vetëm si një spiker, gazetar, drejtor në RTSH, ambasador në Suedi, por edhe për shumë punë e suksese të tjera që e kanë shoqëruar në çdo fushë ku ka punuar me mjaft përkushtim.
