TIRANË , 12 nëntor 2026/Albania Express News/-Armando Sadiku ka mbyllur një nga kapitujt më të rëndësishëm të karrierës së tij sportive. Ish-sulmuesi i Kombëtares shqiptare ka ndarë me ndjekësit në rrjetet sociale një mesazh emocionues lamtumire, duke njoftuar fundin e rrugëtimit të tij me fanellën kuqezi dhe largimin nga futbolli.
Një lamtumirë që vjen pas vitesh përkushtimi, sakrifice dhe emocionesh, në të cilat Sadiku ishte pjesë e historisë së futbollit shqiptar, duke përfaqësuar Shqipërinë në arenën ndërkombëtare.
Një ditë më parë, përpara ndeshjes Shqipëri–Finlandë, në stadiumin “Air Albania”, ish-futbollisti u nderua me një ceremoni të posaçme nga Federata Shqiptare e Futbollit. Presidenti i FSHF-së, Armand Duka, i akordoi një dekoratë mirënjohjeje për kontributin e dhënë me fanellën e Kombëtares.
Në mesazhin e tij, Sadiku shprehu mirënjohjen për të gjithë ata që e shoqëruan gjatë këtij rrugëtimi sportiv: trajnerët, bashkëlojtarët, stafin teknik, presidentin Duka dhe drejtuesit e federatës.
Një falënderim të veçantë ai rezervoi për tifozët kuqezi, të cilët i qëndruan pranë në çdo sfidë, duke e mbështetur dhe motivuar përgjatë viteve.
Për Armando Sadikun, të veshësh fanellën e Shqipërisë dhe të mbash shqiponjën dykrenare në gjoks nuk ishte thjesht një detyrë sportive, por një privilegj dhe një krenari e jashtëzakonshme.
Edhe pse rrugëtimi në fushën e blertë po merr fund, emocionet, kujtimet dhe dashuria për Kombëtaren shqiptare do të mbeten të përjetshme.
Një kapitull mbyllet, por kontributi dhe kujtimet e Armando Sadikut në historinë e futbollit kuqezi do të mbeten pjesë e memories së tifozëve shqiptarë.
