Në ditën e parë të vitit të ri shkollor 2025-2026, deputeti i Partisë Socialiste për Elbasanin, Adi Qose, ka zgjedhur të vizitojë gjimnazin “Dhaskal Todri” në Elbasan, një institucion me të cilin e lidhin kujtime të veçanta, pasi aty ka ndjekur edhe vetë arsimin e mesëm.
“Emocion i veçantë të rikthehesha sërish në shkollën time të dashur ‘Dhaskal Todri’”, ka shkruar Qose në rrjetet sociale, duke shprehur mirënjohje për stafin pedagogjik dhe duke uruar suksese për të gjithë nxënësit në nisje të vitit të ri shkollor.
Deputeti Qose ka ndarë gjithashtu lajmin e mirë se shumë shpejt do të nisë rikonstruksioni i këtij gjimnazi, që prej vitesh konsiderohet një ndër shkollat elitare të qytetit të Elbasanit.
“Me lajmin e mirë që shumë shpejt do të nisë dhe rikonstruksioni i shumëpritur i një prej gjimnazeve elitar të Elbasanit, siç është ‘Dhaskal Todri’, i urova suksese të gjithë nxënësve në këtë vit të ri shkollor”, u shpreh ai.
Ky projekt rikonstruksioni pritet të përmirësojë ndjeshëm infrastrukturën e shkollës, duke krijuar kushte më të mira mësimi për nxënësit dhe stafin arsimor.
albaniaexpress.al