TIRANË, 20 shtator 2026 /Albania Express News/ – Vijojnë protestat qytetare në Tiranë kundër investimit të planifikuar në zonën e Zvërnecit, ndërsa sot u zhvillua dita e 113-të e tubimeve.
Qytetarët u mblodhën në sheshin “Skënderbej” dhe më pas nisën marshimin drejt Kryeministrisë, duke përshkuar bulevardin “Dëshmorët e Kombit”.
Protestuesit shprehën kundërshtimin ndaj projektit turistik në Zvërnec, si dhe ndaj politikave që lidhen me zonat e mbrojtura dhe investimet strategjike. Gjatë marshimit u dëgjuan thirrje kundër qeverisë dhe klasës politike, ndërsa protestuesit kërkuan edhe dorëheqjen e kryeministrit Edi Rama.
Përmes pankartave dhe mesazheve të tyre, qytetarët kanë shprehur kundërshtimin ndaj politikave të qeverisë dhe mënyrës së trajtimit të projekteve të investimeve strategjike.
Në tubimet e zhvilluara gjatë këtyre muajve është përfshirë edhe diaspora, ndërsa organizatorët dhe aktivistët kanë vijuar të përsërisin kërkesat e tyre për ndryshime në politikat që lidhen me territorin, mjedisin dhe investimet.
Susaj: 113 ditë qëndresë
Profesori Lush Susaj i cilësoi 113 ditët e protestës si një burim frymëzimi për vijimin e qëndresës qytetare.
“113 ditë qëndresë, frymëzim për të vijuar drejt qëllimit të përbashkët, çlirimi i Shqipërisë nga mafia e korrupsionit që e ka zanafillën që në vitin 1991 dhe ka zënë të gjitha hapësirat, duke i marrë frymën Shqipërisë”, deklaroi Susaj.
Ai ngriti akuza ndaj qeverisjes dhe korrupsionit, duke argumentuar se sipas tij pasojat e kësaj situate prekin qytetarët, të rinjtë dhe shtresat elitare të shoqërisë.
Myftari: Protesta duhet të propozojë ide konkrete
Aktivisti Florjan Myftari u shpreh se qytetarët e kanë bërë tashmë të qartë qëndrimin e tyre dhe se protesta duhet të kalojë drejt propozimeve konkrete.
“Është momenti që protesta të marrë përgjegjësi e të propozojë ide që mund t’i zhvillojmë vetëm së bashku”, deklaroi Myftari.
Sipas tij, qytetarët shqiptarë e kanë zërin e tyre, ndërsa politikanët vijojnë të mos i dëgjojnë.
Myftari theksoi gjithashtu se gjatë këtyre muajve të protestës nuk është shfaqur një lider i vetëm, duke argumentuar se “liderët janë vetë qytetarët”.
Thirrje për protestën e 24 shtatorit
Aktivistja Arvina Lleshi bëri thirrje për pjesëmarrje në protestën e paralajmëruar më 24 shtator përpara Parlamentit.
Ajo kundërshtoi nismat ligjore që, sipas saj, lidhen me zonat e mbrojtura, “Paketën e Maleve” dhe investimet strategjike.
“Ligji nuk është bërë vetëm për qytetarin e thjeshtë, ligji është bërë për të gjithë. Edhe për atë që ka pushtet, për atë që ka lekë, që ka lidhje, edhe për atë që ulet në zyrën më të madhe të shtetit”, deklaroi Lleshi.
Ajo u bëri thirrje qytetarëve që t’i bashkohen tubimit të 24 shtatorit para Parlamentit, duke e lidhur protestën me kundërshtimin ndaj nismave ligjore të përmendura prej saj.
Pas qëndrimit përpara Kryeministrisë, qytetarët vijuan marshimin në rrugët e Tiranës, duke shënuar kështu ditën e 113-të të protestave.