FIRENCE, 18 shtator 2026 /Albania Express News/ – Banesa ku jeton kardinali shqiptar Ernest Simoni, në Piazza Duomo, në zemër të Firences, është bërë objekt i një grabitjeje, ndërsa hajdutët kanë arritur të depërtojnë në apartament duke çarë një mur me dalta.
Sipas raportimeve të mediave italiane, autorët kanë marrë para cash, sende ari, bizhuteri, medalje dhe objekte të tjera me vlerë. Dëmi i përgjithshëm vlerësohet në rreth 30 mijë euro.
Mes sendeve të vjedhura ndodhet edhe leja e qëndrimit e kardinalit Ernest Simoni, 97 vjeç, dokument që mbahej në një sirtar të banesës.
Në momentin e grabitjes, kardinali Simoni nuk ndodhej në Firence. Ai ishte në Londër, ku kishte zhvilluar një takim me Mbretin Charles. Kardinali shqiptar, i mbijetuar i përndjekjeve të regjimit komunist në Shqipëri, u emërua nga Papa Françesku kardinal në vitin 2016.
Në apartament jeton edhe nipi i tij, Tonin Simoni, së bashku me bashkëshorten. Çifti ishte larguar nga banesa rreth orës 13:00 dhe kur u kthye, rreth orës 23:00, e gjeti shtëpinë tërësisht të përmbysur.
Autorët dyshohet se kanë përdorur dy dalta për të çarë murin dhe për të krijuar një kalim drejt apartamentit. Mjetet e përdorura janë gjetur më pas të braktisura në hapësirat e përbashkëta të pallatit.
Pasi kanë hyrë në banesë, grabitësit kanë kontrolluar dollapët, sirtarët, kutitë dhe valixhet, duke kërkuar sende me vlerë.
Fakti që autorët kanë mundur të kryejnë një ndërhyrje të tillë pa u diktuar ka ngritur pikëpyetje te familjarët.
“Jemi të tronditur nga ajo që ndodhi. Ndiheshim të sigurt. Mund të prisnim gjithçka, përveçse hajdutët të arrinin të bënin një gjë të tillë në Piazza Duomo, ndoshta edhe në mes të ditës”, është shprehur Tonin Simoni për mediat italiane.
Në vendngjarje mbërritën Karabinierët dhe ekspertët e hetimeve shkencore, të cilët kryen këqyrjen e banesës dhe nisën mbledhjen e gjurmëve që mund të ndihmojnë në identifikimin e autorëve.
Hetuesit po analizojnë gjithashtu pamjet e kamerave të sigurisë në zonën e Piazza Duomo, ndërsa familjarët dyshojnë se grabitësit mund ta kenë vëzhguar banesën përpara se të kryenin vjedhjen.
“Sigurisht që nuk kanë vepruar rastësisht. Na kanë mbajtur nën vëzhgim dhe e dinin që nuk ishim në shtëpi”, ka deklaruar Tonin Simoni.
Mes sendeve të marra nga grabitësit janë edhe bizhuteri të bashkëshortes së Toninit, disa medalje, një vulë ari, para cash dhe sende të tjera me vlerë. Autorët kanë marrë madje edhe një kabllo të një PlayStation-i të vjetër, që u përkiste fëmijëve të familjes.
Por një prej sendeve më të pazakonta të vjedhura është pikërisht leja e qëndrimit e kardinalit Simoni.
“Vjedhja e këtij dokumenti është mjaft e çuditshme, përveç rastit kur dikush ka ndërmend ta falsifikojë”, ka thënë nipi i kardinalit.
Kardinali pyet për statujat fetare
Kur mori vesh për grabitjen, kardinali Ernest Simoni, sipas rrëfimit të nipit të tij, nuk u interesua fillimisht për paratë apo sendet me vlerë.
Pyetja e tij e parë ishte për objektet fetare që mban në dhomën e tij:
“A e kanë lënë statujën e Zonjës së Medjugorjes? Po statujën e Padre Pios?”
Kur Tonin e siguroi se statujat nuk ishin dëmtuar dhe ndodheshin ende në vendin e tyre, kardinali u përgjigj:
“Atëherë, nuk ka problem.”
Hetimet për identifikimin e autorëve vijojnë. Karabinierët po analizojnë gjurmët e gjetura në banesë dhe pamjet e kamerave të sigurisë, me qëllim zbardhjen e plotë të grabitjes dhe identifikimin e personave përgjegjës.