Tiranë, 17 shtator 2026 /Albania Express News/- Kastriot Hasko, biznesmen dhe pronar i linjës “MonCafe” dhe i një biznesi me të njëjtin emër në Vlorë, është arrestuar mbrëmjen e djeshme nga Policia e Fierit, pas një urdhër-arresti të nxjerrë nga Prokuroria.
Hasko, 70 vjeç, është vënë në pranga në kuadër të një hetimi që lidhet me dyshimet për falsifikim të dokumenteve të pronësisë në zonën e Semanit të Fierit.
Në të njëjtën çështje është arrestuar edhe Ertis Shehu, ish-drejtor i Agjencisë Shtetërore të Kadastrës në Fier, i cili ka drejtuar institucionin gjatë periudhës 2019–2021.
Sipas hetimeve të prokurorisë, çështja lidhet me dokumentacionin e një sipërfaqeje toke në Seman, ndërsa hetimet për këtë pronë kanë nisur që në vitin 2024. Pas përfundimit të hetimeve, organi i akuzës ka proceduar me nxjerrjen e urdhër-arresteve për personat e dyshuar.
Emri i Haskos u bë publik edhe nga konflikti për pronën në Palasë
Arrestimi i Kastriot Haskos vjen në një moment kur emri i tij është bërë i njohur edhe për shkak të një konflikti të shumëpërfolur mes dy biznesmenëve, Vasil Bedinaj dhe Luan Muça, për një sipërfaqe toke në Palasë.
Përplasja mes palëve kulmoi më 6 shtator, në ambientet e hotelit “Regina Palm”, ku situata për pak sa nuk përfundoi në një konflikt me armë.
Pas ngjarjes, Kastriot Hasko foli publikisht në emisionin “Top Story”, ku deklaroi se prona për të cilën kishte nisur konflikti i përkiste atij dhe se dispononte dokumentacion hipotekor për të.
Hasko pretendoi se tokën e kishte përfituar nëpërmjet trashëgimisë nga nëna e tij dhe se kishte lidhur një kontratë bashkëpunimi me kompaninë “Regina Group” për zhvillimin e pronës.
Nga ana tjetër, Luan Muça kishte pretenduar më herët se prona ishte marrë prej tij dhe se dispononte edhe leje për ndërtim në atë zonë.
Hetimi i veçuar nga konflikti në Palasë
Pavarësisht se emri i Haskos është përmendur së fundmi në konfliktin për pronën në Palasë, arrestimi i tij nga Prokuroria e Fierit lidhet me një çështje tjetër, atë të dokumentacionit të pronës në Seman.
Sipas akuzës, dyshimet lidhen me falsifikimin e dokumenteve të pronësisë dhe përfshirjen e personave që kanë pasur funksione në strukturat e kadastrës.
Hetimet vijojnë për të dokumentuar rrethanat e plota të çështjes dhe përgjegjësitë konkrete të personave të përfshirë.
Kastriot Hasko dhe Ertis Shehu prezumohen të pafajshëm deri në një vendim gjyqësor të formës së prerë.