TIRANË, 17 shtator 2026 /Albania Express News/ – Deputetja Marjana Koçeku ka folur këtë të enjte për vendimin e saj, të marrë disa muaj më parë, për t’u larguar nga radhët e Partisë Socialiste dhe për të vijuar mandatin si deputete e pavarur.
Koçeku tha se vendimi për largimin nga PS ka qenë një zgjedhje personale, të cilën, sipas saj, nuk ia ka komunikuar paraprakisht askujt, me qëllim që të mos ndikohej nga qëndrimet apo opinionet e të tjerëve.
Ajo deklaroi se do ta vijojë deri në fund këtë qëndrim, duke iu referuar edhe parimit kushtetues që mandati i deputetit i përket popullit.
“Vendimin tim për largimin nga PS nuk ia kam komunikuar askujt për të mos lënë hapësira ndikimi. Ka qenë një vendim që e kam konsultuar vetëm me veten, do e vazhdoj deri në fund. Ma garanton Kushtetuta që mandati i deputetit i përket popullit”, u shpreh Koçeku.
Më tej, ajo theksoi se aktualisht nuk ka marrëdhënie politike me anëtarët e Partisë Socialiste dhe e cilësoi veten si deputete të pavarur të Kuvendit.
“Unë nuk kam asnjë raport me asnjë anëtar të PS. Jam deputet i pavarur i këtij Kuvendi”, deklaroi Marjana Koçeku.
Largimi i Koçekut nga grupimi politik me të cilin ishte zgjedhur dhe vijimi i mandatit si deputete e pavarur përbën një zhvillim në raport me pozicionimin e saj të mëparshëm politik.