Tiranë, 11 shtator 2026 /Albania Express News/ – Inspektorati i Përgjithshëm zhvilloi një tryezë dialogu me përfaqësues të shoqatave, dhomave të tregtisë dhe organizatave përfaqësuese të biznesit, me fokus forcimin e komunikimit dhe bashkëpunimit në kuadër të sistemit të ri të inspektimit.
Takimi u hap nga Inspektori i Përgjithshëm, Dashnor Sula, i cili prezantoi qasjen e re të institucionit ndaj veprimtarisë inspektuese, të mbështetur në partneritetin me komunitetin e biznesit, transparencën, proporcionalitetin dhe respektimin e kuadrit ligjor.
Gjatë diskutimeve u theksua nevoja për një marrëdhënie të re ndërmjet strukturave inspektuese dhe sipërmarrjes, ku biznesi të konsiderohet partner në garantimin e standardeve dhe respektimin e ligjit dhe jo vetëm subjekt kontrolli.
Në këtë drejtim, inspektimi u cilësua si një instrument që duhet të kontribuojë në parandalimin e shkeljeve, përmirësimin e standardeve dhe garantimin e konkurrencës së ndershme në treg.
Inspektime të orientuara nga niveli i riskut
Një nga çështjet kryesore të tryezës ishte zbatimi i inspektimeve të bazuara në analizën e riskut. Sipas qasjes së diskutuar, kontrollet duhet të përqendrohen te subjektet dhe sektorët me nivel më të lartë rreziku, duke shmangur kontrollet e panevojshme dhe barrën e pajustifikuar administrative për bizneset që respektojnë kërkesat ligjore.
Vëmendje iu kushtua edhe bashkërendimit të veprimtarisë inspektuese ndërmjet institucioneve, me qëllim shmangien e kontrolleve të përsëritura ndaj të njëjtit subjekt dhe për të njëjtin objekt.
Në tryezë u diskutua gjithashtu rishikimi i veprimtarisë së shoqërive private të licencuara për inspektim, forcimi i standardeve profesionale dhe garantimi që në treg të operojnë vetëm subjekte serioze, profesionale dhe të përgjegjshme.
Biznesi kërkon shmangien e kontrolleve të përsëritura
Përfaqësuesit e biznesit ngritën shqetësime lidhur me kontrollet e përsëritura dhe tarifat fikse që aplikohen në fillim të çdo viti.
Në këtë kuadër, u kërkua që task-forcat e krijuara me vendim të Këshillit të Ministrave të jenë funksionale dhe efektive, ndërsa kriteret për organizimin, veprimtarinë dhe përfshirjen e shoqërive të licencuara të jenë të qarta.
Një tjetër propozim i rëndësishëm ishte kalimi nga një kulturë e orientuar kryesisht drejt gjobave në një qasje më parandaluese dhe këshilluese, aty ku niveli i riskut dhe kuadri ligjor e lejojnë.
Bizneseve, sipas diskutimeve, duhet t’u krijohet mundësia për të korrigjuar problematikat e konstatuara brenda afateve të arsyeshme. Në këtë kuadër u propozua edhe vlerësimi i mundësisë së një periudhe tranzitore deri në vitin 2027, në varësi të sektorit, nivelit të riskut dhe natyrës së problematikës.
Megjithatë, u nënvizua se parimi i këshillimit duhet të zbatohet në raport me nivelin real të riskut. Në sektorët me risk të lartë, veçanërisht në industrinë ushqimore dhe në veprimtaritë që lidhen me produkte potencialisht të dëmshme, parandalimi dhe kontrolli efektiv duhet të kenë përparësi.
Trajnim, kontroll mjedisor dhe mbrojtje e konsumatorit
Gjatë tryezës u diskutuan edhe një sërë çështjesh të tjera që lidhen me reformimin dhe forcimin e sistemit të inspektimit.
Ndër propozimet dhe çështjet e ngritura ishin:
- forcimi i përgatitjes juridike të inspektorëve dhe krijimi i mekanizmave juridikë që ndihmojnë në vlerësimin e çështjeve përpara marrjes së masave ndaj subjekteve;
- zgjerimi i programeve të trajnimit për inspektorët dhe bashkëpunimi me universitetet shqiptare;
- identifikimi i qartë i inspektorit, përcaktimi i objektit të kontrollit dhe përmirësimi i njoftimit paraprak, në përputhje me kuadrin ligjor;
- forcimi i kontrolleve mjedisore ndaj subjekteve që shkarkojnë ujëra të ndotura në lumenj, dete dhe burime të tjera ujore;
- marrja e masave më të forta parandaluese ndaj subjekteve që importojnë ose tregtojnë produkte që paraqesin rrezik për shëndetin dhe sigurinë;
- vlerësimi i mundësive për mbështetjen financiare të bizneseve përmes instrumenteve të kreditimit të butë dhe normave më të favorshme të interesit;
- forcimi i kontrolleve ndaj njësive të akomodimit të promovuara përmes platformave si Airbnb, si dhe strukturave të tjera të palicencuara që krijojnë konkurrencë të pandershme ndaj operatorëve të licencuar.
Në përfundim të takimit, Inspektorati i Përgjithshëm dhe përfaqësuesit e biznesit shprehën vullnetin për vijimin e një dialogu të strukturuar dhe të qëndrueshëm.
Synimi i përbashkët është ndërtimi i një sistemi inspektimi të bazuar në risk, të bashkërenduar, transparent dhe proporcional, i cili garanton mbrojtjen e interesit publik dhe konkurrencën e ndershme, duke mbështetur njëkohësisht bizneset në respektimin e ligjit.
