Tirana ka qenë në qendër të vëmendjes ditët e fundit për spekulimet mbi formimin e qeverisë së re, por qëndrimi i Milena Haritos në kryeqytet ka një tjetër arsye. Ish-ministrja e Inovacionit në qeverinë “Rama 1” dhe kushërira e kryeministrit Edi Rama ka marrë pjesë në ceremoninë përkujtimore për babain e saj, Fatos Harito.
Fatos Harito, i cili ndërroi jetë një vit e gjysmë më parë, është i njohur si “babai” i mjekësisë ligjore shqiptare. Në nder të tij, salla e leksioneve e Institutit të Mjekësisë Ligjore do të mbajë emrin Fatos Harito.
Ceremonia u ndoq nga familjarë, kolegë dhe miq nga fushat e mjekësisë dhe drejtësisë. Ministri Ulsi Manja e përshkroi Fatos Hariton si një pionier të mjekësisë ligjore, i cili me profesionalizëm, integritet dhe përkushtim formoi breza studentësh dhe ngriti standardet e shërbimit për vendin.