TIRANË ,04 shtator 2026 / Albania Express News /-Kryeministri Edi Rama ka përgëzuar homologen e tij italiane, Giorgia Meloni, e cila ka shënuar një rekord historik në drejtimin e qeverisë italiane.
Rama e uroi Melonin për mandatin më jetëgjatë në historinë e Republikës Italiane, ndërsa në mesazhin e tij nuk munguan batutat për politikën italiane, gratë në pushtet dhe marrëdhëniet me Europën.
“Tani të ka mbetur vetëm një rekord për të thyer, rekordi im”, u shpreh Rama.
“Giorgia, lexoj se që nga sot je në krye të qeverisë më jetëgjatë në historinë e Republikës Italiane. Por vërtet? Unë isha mësuar me Marion të ndryshonte bashkëbiseduesit në Romë pothuajse me të njëjtin ritëm si ndryshimet e trajnerëve te Milani.
E megjithatë, shiko çfarë demokracie e çuditshme italiane: nuk duket aspak si një rrezik, pavarësisht gjithçkaje që, sidomos ne në të majtë, kishim parashikuar kur ti mbërrite në Palazzo Chigi, me pantallona të zeza. Mbaj mend që edhe Ursula, në atë kohë, ishte shqetësuar pak.
Sot, përkundrazi, edhe ajo do të jetë shumë e lumtur për këtë rekord tëndin. Sepse, në vend që të marshoje mbi trupin e Evropës, siç kishim frikë, ti e përqafove Evropën dhe madje e ndihmove të kuptonte më mirë disa gjëra: ruajtjen e sigurisë, luftën kundër emigracionit të paligjshëm, sigurisht.
Por gjithsesi, duhet thënë e gjithë e vërteta: në krye je ti. Ka një deficit të madh demokratik në Itali. I ke nxjerrë jashtë burrat nga lufta për pushtet, e cila tashmë është kthyer në një çështje mes grave, ekskluzivisht mes grave.
Çfarë të të them e dashur, Giorgia? Tani ka edhe një rekord tjetër për t’u thyer: rekordi im. Dhe mos të më thonë se Italia nuk është në Ballkan, sepse ne jemi gjithmonë pas Gjermanisë, ku një tjetër zonjë e shquar ka qeverisur edhe më gjatë se unë.
Mirë pra. Rroftë Italia, rrofshin gratë, italiane dhe shqiptare”, tha kryeministri Rama.