Nga profesore e asociuar
Dr. Eleni Kocaqi
TIRANË , 22 gusht 2026/Albania Express News/-Arsyeja numër një pse shqiptarët nuk kanë liderë politikë patriotë dhe të aftë për të qeverisur, por në shumicën e rasteve përballen me figura të korruptuara dhe të paafta, lidhet me historinë e gjatë të goditjes së elitave dhe shtresës drejtuese të vendit.
Pushtimi osman rrëmbeu dhe rekrutoi një pjesë të konsiderueshme të fisnikërisë shqiptare. Një pjesë u largua drejt Lindjes, një tjetër drejt Perëndimit, ndërsa shumë të tjerë u vranë. Sikur të mos mjaftonte kjo, edhe ata pak që mbetën u goditën dhe u zhdukën gjatë periudhës së komunizmit.
Kjo traditë fisnikërie, sipas autores, kishte një trashëgimi të gjatë dhe ishte e formuar për të drejtuar. Një shembull i rëndësishëm është Aleksandri i Madh, i cili, përveçse një lider i shquar, u edukua me dije, disiplinë dhe virtyte që lidhen me përgjegjësinë ndaj vendit dhe popullit.
Liderët e dikurshëm lindeshin dhe edukoheshin me synimin për të udhëhequr, duke u formuar me vlera, dije dhe aftësi të mëdha, por mbi të gjitha me ndjenjën e përgjegjësisë dhe besnikërisë ndaj vendit dhe popullit.
Sot, sipas Kocaqit, në majat e shtetit mund të ngrihen njerëz pa formimin, vetëdijen dhe atdhedashurinë e nevojshme për të drejtuar një vend. Në vend të interesit publik, këta mund të ndërtojnë kulte individësh, të krijojnë pasuri përmes korrupsionit dhe ta përdorin shtetin në funksion të interesave personale.
Është një deformim i madh i parimit të qeverisjes që një individ ta vendosë veten mbi shtetin dhe kombin. Egot e sëmura për pushtet, që e marrin peng një shoqëri për interesat e tyre, përbëjnë një rrezik serioz për demokracinë dhe të ardhmen e vendit. Pas tyre, shpesh, qëndrojnë grupe njerëzish që, për interesa personale, përfitime apo një vend pune, pranojnë të mbështesin çdo vendim apo veprim të tyre.
Një tjetër problem, sipas autores, është se intelektuali dhe atdhetari shpesh nuk konsiderohen si figura të denja për pushtet. Përkundrazi, atyre u këshillohet të qëndrojnë larg politikës, duke i lënë hapësirë njerëzve pa vizion dhe pa formimin e duhur.
“Aq kohë sa të bridhni pas banditëve, hajdutëve, të paaftëve, tradhtarëve dhe mashtruesve, jo vetëm do të vuani, por do të rrezikoni edhe ekzistencën”, shprehet Kocaqi.
Në fund, ajo propozon krijimin e një dege universitare kombëtare, të fortë dhe të specializuar, e cila do të kishte si qëllim përgatitjen e liderëve të së ardhmes.
Sipas saj, vetëm përmes edukimit, formimit dhe përgatitjes së një elite të re drejtuese mund të ndërtohet një klasë politike e aftë për t’i shërbyer interesit kombëtar. Përndryshe, paralajmëron ajo, pasojat e mungesës së liderëve të vërtetë do të vazhdojnë të rëndojnë mbi shoqërinë shqiptare.