TIRANË ,14 gusht 2026/Albania Express News/-Kapiteni i Kombëtares shqiptare, Berat Gjimshiti, pritet të përfitojë një pagë marramendëse në aventurën e tij të re, me kontratën që kap shifrën e rreth 77 mijë eurove në javë.
Futbollisti me prejardhje nga Tërnoci i Madh do të arkëtojë afërsisht 11 mijë euro në ditë, ndërsa në një muaj të ardhurat e tij shkojnë në rreth 333 mijë euro. Nëse llogaritet në bazë vjetore, shifra arrin në rreth 4 milionë euro.
Bëhet fjalë për një kontratë tejet luksoze për mbrojtësin shqiptar, i cili po përgatitet të nisë një kapitull të ri në karrierën e tij.
Gjimshiti, një prej figurave kryesore të Kombëtares kuqezi dhe një nga mbrojtësit më të spikatur shqiptarë në arenën ndërkombëtare, shpërblehet kështu me një marrëveshje që e rendit mes futbollistëve shqiptarë me të ardhurat më të larta.
Pas viteve të suksesshme në futbollin europian, kapiteni i Shqipërisë tashmë synon të vijojë karrierën në nivele të larta, ndërsa kontrata e re konfirmon edhe një herë vlerësimin e madh për eksperiencën dhe cilësitë e tij.
