Nga Sara Tarko
DIVJAKË , 05 gusht 2026 / Albania Express News /-Protesta e pestë radhazi kundër projektit të reformës së re territoriale u zhvillua mbrëmjen e së martës në sheshin kryesor të Divjakës, ku dhjetëra qytetarë u mblodhën për të shprehur kundërshtimin e tyre ndaj planit që parashikon shkrirjen e Bashkisë Divjakë dhe bashkimin e saj me Bashkinë Lushnjë.
Banorët e konsiderojnë këtë projekt të papranueshëm, duke argumentuar se një bashkim i tillë do të sillte largimin e shërbimeve publike nga qyteti, vështirësi më të mëdha për qytetarët dhe pasoja të drejtpërdrejta në jetën ekonomike e sociale të zonës. Sipas tyre, Divjaka ka identitetin, potencialin dhe kapacitetet për të vijuar të funksionojë si njësi e pavarur vendore.
Gjatë tubimit, qytetarët mbajtën fjalime ku renditën arsyet pse Bashkia Divjakë nuk duhet të shkrihet. Ata theksuan se një reformë e tillë do të cenonte interesat e komunitetit dhe do të dobësonte përfaqësimin institucional të qytetit.
Protestuesit u bënë gjithashtu thirrje të gjithë banorëve të Divjakës që t’u bashkohen protestave në ditët në vijim, duke kërkuar një pjesëmarrje edhe më të madhe qytetare. Ata apeluan edhe për angazhim maksimal nga punonjësit e administratës vendore në mbështetje të kauzës për ruajtjen e bashkisë.
Një nga mesazhet kryesore të përcjella gjatë protestës ishte vendosmëria për të mos u tërhequr nga kjo lëvizje. Banorët deklaruan se protestat do të vijojnë pa ndërprerje deri në momentin kur qeveria të tërheqë projektin dhe të njoftojë zyrtarisht anulimin e planit për shkrirjen e Bashkisë Divjakë.
Në përfundim të fjalimeve, protestuesit zhvilluan një marshim në rrugët kryesore të qytetit, duke bërë thirrje që sa më shumë qytetarë divjakas t’i bashkohen kësaj nisme në mbrojtje të autonomisë së bashkisë.
Ndryshe nga mbrëmjet e mëparshme të protestës, këtë herë kryetari i Bashkisë Divjakë nuk u ngjit në podium për të mbajtur fjalë mbi këtë çështje, ndërsa protesta u zhvillua në një atmosferë të qetë dhe pa incidente. Organizatorët kanë bërë të ditur se mobilizimi do të vazhdojë edhe në ditët në vijim, me synimin për të rritur presionin ndaj institucioneve për rishikimin e projektit të reformës territoriale.