DIVJAKË ,04 gusht 2026/Albania Express News/- Kryetari i Bashkisë Divjakë, Josif Gorrea, ka dalë hapur kundër propozimit për shkrirjen e kësaj bashkie dhe bashkimin e saj me Bashkinë e Lushnjës, në kuadër të projektit të reformës së re territoriale-administrative.
Gorrea është pozicionuar krah qytetarëve në protestat e zhvilluara në sheshin qendror të Divjakës, ku banorë të zonës kanë kundërshtuar draftin e propozuar, duke kërkuar që Divjaka të ruajë statusin e saj si njësi e pavarur e qeverisjes vendore.
Kryebashkiaku argumenton se Divjaka plotëson të gjitha kriteret për të vijuar si bashki më vete dhe se vlerësimi i përdorur në hartimin e reformës territoriale nuk është aplikuar me të njëjtat standarde për të gjitha njësitë vendore.
Sipas tij, treguesit territorialë, demografikë, ekonomikë, natyrorë dhe historikë e bëjnë Divjakën një bashki me peshë të rëndësishme jo vetëm për qarkun e Fierit, por edhe për zhvillimin e vendit.
“Në qarkun e Fierit, Divjaka është bashkia e tretë për nga sipërfaqja, pas Fierit dhe Lushnjës. Ne kemi 309 kilometër katrorë territor”, deklaroi Gorrea, duke krahasuar shifrat me njësi të tjera vendore që sipas tij do të vijojnë të ekzistojnë pavarësisht madhësisë më të vogël territoriale.
Ai solli si shembull Bashkinë e Roskovecit, e cila sipas tij ka një sipërfaqe dhe popullsi më të vogël, por nuk është përfshirë në projektin e shkrirjes.
“Roskoveci është një bashki me njerëz punëtorë, por territori i saj është rreth 118 kilometra katrorë. Ndërsa Divjaka ka një territor shumë më të madh dhe një potencial të jashtëzakonshëm zhvillimi”, u shpreh kryebashkiaku.
Popullsia, bujqësia dhe pasuritë natyrore, argumente për ruajtjen e Bashkisë Divjakë
Gorrea theksoi gjithashtu se Divjaka ka një bazë të fortë demografike dhe ekonomike, duke përmendur të dhënat e fundit të Censit, sipas të cilave bashkia numëron rreth 25 mijë banorë.
Ai nënvizoi se territori i Divjakës karakterizohet nga një reliev kryesisht fushor, me një nga zonat më pjellore bujqësore në vend, duke e bërë një nga qendrat e rëndësishme të prodhimit bujqësor.
“Relievi i Divjakës është fushor. Kemi rreth 20 mijë hektarë fushë, nga të cilat pjesa më e madhe është tokë e pastër bujqësore me potencial të madh ekonomik”, tha ai.
Por përtej shifrave, kryebashkiaku e mbështeti kundërshtimin edhe te identiteti historik dhe natyror i zonës.
“Divjaka ka një identitet të hershëm. Emri i saj lidhet me një histori që nis rreth vitit 1440. Kjo trevë jeton mes dy qendrave të mëdha historike, Apolonisë dhe Dyrrahut”, deklaroi Gorrea.
Ai përmendi gjithashtu pasuritë natyrore që, sipas tij, e bëjnë Divjakën një zonë unike: Parkun Kombëtar të Divjakë-Karavastasë, lagunën, biodiversitetin, tokat pjellore dhe resurset ujore.
“Divjaka ka një natyrë të jashtëzakonshme. Ka lagunën, tokat pjellore, ujërat, pelikanin kaçurrel, flamingot dhe një potencial të madh turistik që duhet zhvilluar”, u shpreh kryebashkiaku.
Këshilli Bashkiak kundër draftit, nis përgatitja e argumenteve ligjore
Josif Gorrea bëri të ditur se Këshilli Bashkiak i Divjakës ka miratuar një qëndrim zyrtar kundër projektit për bashkimin me Lushnjën, ndërsa është ngritur një grup pune për hartimin e dokumentacionit dhe argumenteve që do t’u paraqiten institucioneve përgjegjëse.
Sipas tij, Bashkia Divjakë do të ndjekë të gjitha procedurat institucionale, duke përfshirë analizimin e dokumenteve të ardhura nga Kuvendi, përgatitjen e amendamenteve dhe organizimin e dëgjesave publike me qytetarët në të gjitha njësitë administrative.
“Këshilli Bashkiak ka mbajtur mbledhje të jashtëzakonshme dhe është shprehur kundër. Ne do të përgjigjemi pikë për pikë ndaj kërkesave dhe argumenteve të paraqitura në draft. Do të zhvillojmë dëgjesa publike dhe do të ndjekim të gjitha rrugët institucionale për të mbrojtur identitetin, fuqinë ekonomike dhe pasuritë natyrore të Divjakës”, tha Gorrea.
Ai bëri të ditur gjithashtu se bashkia ka ftuar edhe përfaqësuesit e opozitës lokale që të kontribuojnë me argumente dhe propozime në mbrojtje të qëndrimit të përbashkët.
“Divjaka është identitet kombëtar, nuk duhet humbur”
Në përfundim të deklaratës së tij, kryebashkiaku Josif Gorrea theksoi se beteja për ruajtjen e Bashkisë Divjakë do të vijojë përmes rrugëve institucionale dhe dialogut me institucionet qendrore.
“Do të bëjmë gjithçka për të bindur qeverinë shqiptare se Bashkia Divjakë është një identitet kombëtar, një zonë me vlera të jashtëzakonshme që nuk duhet humbur, por duhet të qëndrojë e fortë dhe e zhvilluar”, përfundoi ai.
Protestat në Divjakë pritet të vijojnë, ndërsa banorët dhe drejtuesit vendorë kërkojnë rishikimin e draftit të reformës territoriale dhe ruajtjen e autonomisë së kësaj bashkie.